တောင်ပြုံးပွဲတော်အား အက်ဆေးတစ်ပုဒ် ဖော်ကြည့်ခြင်း
မြန်မာနိုင်ငံတွင် နတ်ကိုးကွယ်မှု့အစ မောင်တင့်တယ်ကဟု အဆိုပြု၍ရသလို နတ်ကိုးကွယ်မှု့အစ အေဒီလေးရာစု ပုဂံခေတ်ဦးကဟု အမှတ်အသားတင်ခဲ့ကြလေသည်။
တကောင်းရှင်ဘုရင်မှ စကားပင်တွင် ချည်နှောင်၍ ဖိုကျင်ထိုးသတ်ခဲ့သော ပန်းပဲမောင်တင့်တယ်နှင့် မောင်တော်ကြောင့် မီးပုံထဲသို့ ခုန်ဆင်း၍ သေခဲ့သော နှမတော် စောမယ်ယာတည်းဟူသော နတ်မောင်နှမတို့မှာ နတ်ဖြစ်ပြီးနောက် ဘုံဗိမာန်မရှိရှာဘဲ အနှီစကား၌ပင် နေကြရလေသတတ်။
နတ်မောင်နှမတို့မှာထိုစကားပင်တွင် နေထိုင်ကြရင်း လူအများကို ခြောက်လှန့်ခဲ့သောကြောင့် တကောင်းဘုရင်မှ စကားပင်ကို အမြစ်မှတူး၍ ဧရာဝတီမြစ်ထဲ မျှောပစ်ခဲ့ရာမှ အဆိုပါ စကားပင်မှာ ပုဂံမင်းနေပြည်တော်၏ ကျေးလက်ဖြစ်သော ညောင်ဦးကမ်းပါးတွင် တင်လေသည်။
ထိုအခါက ပုဂံပြည်တွင် သေလည်ကြောင်မင်းက ထီးနန်းအုပ်စိုးနေသော အချိန်ခါဖြစ်ပေသည်။ စကားပင်နှင့်အတူ တကောင်းပြည်မှ ပုဂံသို့တိုင် ဧရာဝတီမြစ်ပြင်ကျယ်တွင် စုန်လာရရှာသော နတ်မောင်နှမမှ သေလည်ကြောင်မင်းကို အိပ်မက်ပေး၍ သူတို့နှစ်ဦးအတွက် နေစရာတစ်နေရာပေးရန် တောင်းပန်ခဲ့ပါသဖြင့် ပုပ္ပါးတောင်အခြေတွင် နေရာပေးသနားခဲ့ရာမှ အစပြု၍ နတ်ကွန်းနတ်နန်းနှင့် ရုပ်တုပြုလုပ်၍ ကိုးကွယ်ခဲ့ကြလေသည်။
ပုဂံခေတ်ဦးမှ အစပြု ကိုးကွယ်ခဲ့ကြပြီး ယနေ့ခေတ်တိုင် တစ်ချို့သော အရပ်ဒေသများတွင် အတွင်း ( ၃၇ )မင်း ၊ အပြင် ( ၃၇ )မင်း ၊ ဟူ၍ နတ်ရုပ်တုကြီးများကို ပူဇော်ကြသော နတ်ပွဲကြီးများ ခြိမ့်ခြိမ့်သဲ ကျင်းပနေကြသည်။
ရွှေစည်းခုံစေတီတော်၏ တံတိုင်းအတွင်းဘက်တွင်ရှိသော သကြား ၊ တေရဌ ၊ ၀ိရုပက္ခ ၊ ကုဝေရ ၊ မဟေသေရ ၊ ရွှေညိုသင် ၊ မဟာပိန္နဲ ၊ ရွှေမြို့ရှင် ၊ စတုမဟာ နတ်မင်းကြီးလေးပါးတို့ အပါအ၀င် နတ်ရုပ်ကြီး ( ၃၇ )ရုပ်တို့ကို အတွင်းသုံးဆယ့်ခွန်နစ်မင်း ဟူ၍ ခေါ်တွင်ခဲ့ကြသည်။
တံတိုင်း၏ အပြင်ဘက်တွင်ရှိသော မင်းမဟာဂီရိနတ် ၊ နှမတော်ကြီးနတ် ၊ ရွှေနဘေနတ် ၊ သုံးပန်လှနတ် ၊ မနဲမိနတ် ၊ ထောင်မကြီးရှင်ညိုနတ် ၊ မြောက်မြင်းဖြူရှင်နတ် ၊ ထီးဖြူဆောင်းနတ် ၊ ထီးဖြူဆောင်းမယ်တော်နတ် ၊ ပရိမ္မမင်းခေါင်နတ် ၊ ရွှေဖျဉ်းကြီး ၊ ရွှေဖျဉ်းငယ် ၊ မန္တလေးဘိုးတော်နတ် ၊ ရှင်ကွနတ် ၊ ညောင်ချဉ်အိုးနတ် ၊ မင်းစည်သူနတ် ၊ မင်းသားဒန်းမောင်ရှင်နတ် ၊ မင်းကျော်စွာနတ် ၊ အောင်စွာမကြီးနတ် ၊ ရွှေစစ်သင်နတ် ၊ မယ်တော်ရွှေစကားနတ် ၊ ငါးစီးရှင်နတ် ၊ မင်းတရားနတ် ၊ မောင်ပိုးတူနတ် ၊ အနောက်မိဖုရားနတ် ၊ အောင်ပင်လယ်ဆင်ဖြူရှင်နတ် ၊ ရှင်ကုန်းနတ် ၊ ရွှေနော်ရထာနတ် ၊ မင်းရဲအောင်ဒင်နတ် ၊ မောင်မင်းဖြူနတ် ၊ ရှင်တော်နတ် ၊ တပင်ရွှေထီးနတ် ၊ မြောက်ဘက်ရှင်မနတ် ၊ တောင်ငူဘုရင်မင်းခေါင်နတ် ၊ သံတော်ခံနတ် ၊ ယွန်းဘုရင်နတ် ၊ သူရဿတီနတ် စသည်တို့ကို အပြင် ( ၃၇ )မင်းဟူ၍ ခေါ်တွင်ခဲ့ကြလေသည်။
အပြင် ( ၃၇ ) မင်းအစ မင်းမဟာဂီရိကဟု အဆိုရှိခဲ့ကြသော်လည်း ယနေ့ခေတ် နတ်လောက အသိုင်းအ၀န်းတွင်တော့ ရေပန်းစားနေသည့်နတ်မှာကား မင်းကလေးပါတည်း။ မင်းကလေးကတော့ ပိုင်ပိုင်နိုင်နိုင် ၊ မြိုင်မြိုင်ဝေေ၀ မ,စနိုင်သည်ဟု အဆိုရှိကြသည်။ မင်းကြီး ၊ မင်းကလေး( သို့ ) ရွှေဖျဉ်းညီနောင်တို့ကား .....
အိန္ဒိယတိုင်းဖွား ၊ ကုလားဗျတ္တနှင့် ပန်းစားဘီလူးမ မယ်ဝဏ္ဏတို့မှ သားတော်နှစ်ပါးကို ဖွားမြင်ခဲ့ကြလေသည်။ အမည်သညာအားဖြင့် ရွှေဖျဉ်းကြီး ၊ ရွှေဖျဉ်းလေးဟူ၍ ခေါ်တွင်ခဲ့ပါသည်။
ထေရ၀ါဒ ဗုဒ္ဓဘာသာကို ကြည်ညိုပွားများရာတွင် အတုမရှိ စံပြုရသော အနော်ရထာမင်းကြီးသည် တရုတ်ပြည်မှအပြန် တောင်ပြုံးအရပ်တွင် ဆုတောင်းပြည့်စေတီတော် တစ်ဆူကို တည်တော်မူလေသည်။ ထိုဆုတောင်းပြည့် စေတီတော်တွင် အုပ်နှစ်ချပ်မှာ လွတ်နေခဲ့သည်။ အကြောင်းမူကား ......
ရွှေဖျဉ်းညီနောင်တို့မှာ ငယ်စဉ်ကလေးဘ၀မှစ၍ အထိန်းတော်ကြီးတစ်ဖြစ်လဲ ၊ စာရေးတော်ကြီး ဦးသာနိုး၏ ၀ါသနာထုံမွေ့ရာဖြစ်သော သေသောက်ကြူးခြင်းအတတ်နှင့် လောင်းကစားအတတ်တို့ကို အနီးကပ် သင်ကြားပို့ချမှု့နှင့်အတူ အရွယ်ရောက်လာသူ ညီနောင်တို့မှာ ဆရာထက်တပည့် လက်စောင်းထက်လှပါပေသည်။
သေသောက်ကြူးရာတွင် ထိန်းမနိုင် ၊ သိမ်းမရ သတိလက်လွတ် အမူးအမှောက် " ဖလက် "ပြသည့်အထိ သောက်တတ်ကြရာ အနော်ရထာမင်းကြီး တည်ထားကိုးကွယ်တော်မူသော ဆုတောင်းပြည့်စေတီတော်တွင် သူတို့နှစ်ယောက်၏ တာဝန်ဖြစ်သော အုတ်နှစ်ချပ်မှာ လစ်လပ်နေခဲ့လေသည်။
စေတီတော်တွင် အုတ်နှစ်ချပ်လွတ်နေသည်ကို အနော်ရထာမင်းမှ တွေ့မြင်ပြီး မည်သူတာဝန် လစ်ဟင်းသည်ကို အမေးတော်ရှိ၍ တာဝန်လစ်ဟင်းသူအား ကွပ်မျက်စေဟူသော အမိန့်တော်နှင့်အတူ ရွှေဖျဉ်းညီနောင်တို့၏ လည်မြိုပေါ်သို့ ကျရောက်လာခဲ့သော ၀ါးရင်းတုတ်အသံမှာလည်း တောင်ပြုံးတစ်ခွင် ပဲ့တင်ခဲ့သည်။
ဘုရား တရား သံဃာတို့နှင့် ဝေးကွာ၍ ဒါန ၊ သီလ ၊ ဘာဝနာ ပွားများအားထုတ်ခြင်း လုံးဝမရှိခဲ့သော ရွှေဖျဉ်းညီနောင်တို့မှာ မင်းပြစ်ဒဏ်ကြောင့် သေလွန်ခါနီး တရားသဘောကို နှလုံးသွင်းခြင်းမရှိ အာသန္နကံကြောင့် အယူတိမ်း၍ နတ်စိမ်းဖြစ်ကာ ၊ ဘုံဗိမာန်ပိုင်စိုးသော အထက်နတ်ဘ၀သို့ မရောက်ရှိဘဲ ၀ိနိပါတိကပြိတ္တာတည်းဟူသော ဘုံဗိမာန်မရှိသည့် အောက်ဆင့်နတ် ဖြစ်ခဲ့ရလေသည်။
အနော်ရထာမင်းကြီးမှ သနားတော်မူသဖြင့် နေရာလေးတစ်နေရာကို ပေးသနားတော်မူခဲ့လေသည်။
" တောင်ပြုံး "တွင် နေစေဟူ၍ ......
တောင်ပြုံးရွာကလေးမှာ တခြားသောအချိန်များတွင် တိတ်ဆိတ်၍ ငြိမ်သက်နေတတ်သော်လည်း ပွဲတော်ချိန်ခါ ရောက်လာပါလျှင်တော့ ခြေချစရာနေရာမရှိအောင် စည်ကားစမြဲဖြစ်သည်။ မင်းကြီး ၊ မင်းကလေးနတ်နန်းမှလွဲ၍ တခြားသော နတ်နန်းများ မရှိပေ။ ပွဲတော်ချိန်ခါသို့ ရောက်ခါနီးတွင်တော့ ခါတော်မှီ ဆောက်လုပ်ကြသည့် နတ်ကွန်းနတ်အိမ်ကလေးများမှာလည်း အစီအရီ အပြိုင်အဆိုင်။
တောင်ပြုံးပွဲ မစည်ကားသောနှစ်ဟူ၍ မရှိစဖူးခဲ့။ ချိုးရေတော် သုံးသည့်နေ့မှာကား တောင်ပြုံး၏ အစည်ကားဆုံးနေ့ ဖြစ်လေသည်။
တောင်ပြုံးရွာ၏ ပတ်ဝန်းကျင်မှာ အလွန်သာယာသည်။ တောင်ပြုံးဘူတာ၏ မနီးမဝေးနေရာတွင် အနော်ရထာမင်းကြီး တည်ထားတော်မူသည့် ဆုတောင်းပြည့် အုတ်နှစ်ချပ်လပ် စေတီတော်ရှိပြီး ၊ စေတီတော်အောက်ရှိ ရုပ်ပွားတော်မှာ အရှေ့ဘက်အရပ်သို့ မျက်နှာတော်မူထားသည်။
စေတီတော်၏ မျက်နှာတော်မူရာမှာ အရှေ့အရပ်ဖြစ်ပြီး ၊ တောင်ဘက် ၊ မြောက်ဘက်တွင် မုခ်ဝရှိသော်လည်း အနောက်ဘက်တွင်ကား မုခ်ဝမရှိပေ။
စေတီတော်၏ တောင်ဘက်အရပ်တွင်ကား မင်းကြီး ၊ မင်းကလေးတို့၏ နတ်နန်း။ မင်းကြီး ၊ မင်းကလေး ညီနောင်တို့က အနောက်အရပ်သို့ မျက်နှာမူထားကြလေသည်။
အုတ်နှစ်ချပ်လပ်၍ အသတ်ခံရသည့် စေတီတော်ကို စိတ်နာ၍ မျက်နှာမမူလို၍လော ၊ သို့မဟုတ် ရုပ်ပွားတော် မျက်နှာတော်မူရာ အရပ်သို့ မျက်နှာမမူအပ်၍လော ဆိုသည်ကိုကား ခွဲခြား၍ မသိပေ။
အနော်ရထာမင်းတရားကြီးမှ တောင်ပြုံးအရပ် ၊ ဆုတောင်းပြည့်စေတီအနီး နတ်ကွန်းဆောက်လုပ်၍ နေစရာပေးစဉ်က နတ်ကွန်း ၊ နတ်အိမ်မှာကား ကြီးလား ၊ သေးလားမသိ။ ထိုစဉ်က နတ်ကွန်း ၊ နတ်အိမ်ကို မခန့်မှန်းနိုင်သော်လည်း ယခုခေတ် မယ်ဝဏ္ဏနှင့် ရွှေဖျဉ်းကြီး ၊ ရွှေဖျဉ်းလေး ညီနောင်တို့၏ နတ်ကွန်း ၊ နတ်နန်းမှာကား ခန့်ငြားလှပေသည်။
မင်းကြီး ၊ မင်းကလေး နတ်ရုပ်တု နှစ်ခုမှာ သီးသန့်အဆောင်ထဲတွင် ရှိနေကာ ချိုးရေတော်သုံးသည့်အခါတွင် ကြွချီမြန်းသည့် ဝေါယာဉ်တော်ကို ညာဘက်သီးသန့်နေရာတွင် ထားလေသည်။
နတ်နန်းအ၀င်တွင် အနောက်ဘက်သို့ မျက်နှာမူကာ လက်တစ်ဖက်စီ မြှောက်ပင့်ထားသည့် ကျားကြီးနှစ်ကောင်။ ထိုမှတောင်ဘက်တွင် နတ်ထိန်းအိမ်များ ရှိလေသည်။
ပွဲတော်အချိန်များတွင် ငှက်ပျောအုန်းပွဲတို့နှင့် ငရုတ်သီးရဲ ၊ ရေပေါ်ဆီဝေ့နေသည့် ကြက်သားတစ်ပင်တိုင် ဆီနိုင်နိုင်နှင့် အမဲသားဟင်းတို့ဖြင့်လည်း စားတော်ပွဲများ ဆက်ထားလေသည်။
ပွဲတော်ချိန်ခါ ရောက်လာပါလျှင် နတ်နန်းအရှေ့ မြေကွက်လပ်တွင်တော့ နတ်ကွန်းနတ်အိမ်လေးများ အစီအရီထွက်ပေါ်လာကာ နတ်ကွန်း၏ အနောက်ဘက်တွင်တော့ ရပ်ဝေးမှ နတ်ပွဲလာသူများအတွက် ညဉ့်အိပ်ခန်းများရှိသည်။
မင်းနှစ်ပါးကို ငွေတော်များဆက်ပြီး အမ အစ တောင်းခံကြ၍ ကူညီစောင့်ရှောက်ပေးရန် တိုးလျှိုးတောင်းပန်ကြသည်။ မူးကြသည် ၊ ကကြသည်။
သာမန်အချိန်များတွင် အမျိုးသမီးတို့သည် အရက်မူးသမားများကို မြင်တွေ့လျှင် နှာခေါင်းရှုံ့၍ မျက်နှာလွှဲကြသည်။ တောင်ပြုံးပွဲတော်တွင်တော့ ထိုနှင့်ပြောင်းပြန် အရက်မူးသမားများကို ကြည်ကြည်သာသာ ပြုံးမြမြနှင့် ဆက်ဆံကြသည်။ အပြစ်တော်မမြင် အချစ်တော်ဝင်၍ ခွင့်လွှတ်တော်မူနိုင်ကြသည်။ သို့အတွက် နော်ကတတ် မဟုတ်သည့် ၊ နတ်အနွယ်ဝင် မဟုတ်သည့် ဇိုးသမားကြီးများလည်း အလွန်နှစ်ခြိုက်သည့်ပွဲ။
ကိုကြီးကျော်တို့ ၊ မင်းကလေးတို့ကလည်း မူးမှ မြူးမှ ကြိုက်ပေသည်။ အမူးသမားမယားရယ်လို့ မျက်နှာမငယ်ရသည့် တောင်ပြုံးပွဲ။ ဆံဖြူသွား၍ သွားကျိုး ဖိုးဖိုးတို့အရွယ်မှ စ၍ ပုဆိုးကွင်းသိုင်း ကလေးများအရွယ်ထိ သောက်ကြသည့်ပွဲ။ အက၀ါသနာရှင်များအတွက်လည်း လက်ချိုးတတ်သည့် ကလေးအရွယ်မှစ၍ ဆံဖြူသွားကျိုး ဖွားဖွားတို့အရွယ်ထိ နှစ်ခြိုက်သလို က၍ရသည့်ပွဲပင်ဖြစ်လေတော့သည်။
No comments:
Post a Comment